19ti Wuche Mir sind jetzt also scho 19 Woche zäme Schwanger ond de René het glaub au scho chli onder mine Gfühlsschwankige müesse liide. Es tuet mir wörkli leid, aber ich chan nüt de gäge mache. Es goht mir jetzt aber sicher scho en Monet lang wieder sehr guet, au mis Gfühlsläbe hets sich wieder echli gfonde ond tendiert ehner of freud ha ond glöcklich si!! Min Buch wachst langsam - aber sicher !!! Es isch es wonderschöns gfühl es Baby im Buch zha. Wenn i mini Hand uf de Buch legge ond so a oises Chline dänke, öberchonnt mich es enorms Glöcksgfühl ond ich chönnti di ganzi Wält omarme!! Wichtig isch mir au, dass ich min Buch jetzt bsonders tuen verwöhne mit äre feine Créme. Möcht jo nachhär ned onbedingt usgseh wie nes Zebra !! Am schönschte isch es natürlich wenn de René "oise" Buch tuet pflege ond verwöhne! Aafangs vo dere Woche, han ich oises Baby s'erschti mol döfe gspühre!! Es isch gsi, wie wenn öpper ganz fiin vo inne här achlopfed ond möchti Hallo säge!! Mis härz het en froide gommp gmacht ond mini liebi zo oisem ongeborene Chind isch mir ganz fescht bewosst worde. Ich dänke ab dem momänt wo mer sis Baby gspührt, chan mer au aafange en richtigi Beziehig ufbaue zo dem Chline Wörmel. So wahnsinnig chli isch es gar nömme, luut de Büecher isch jetzt oises Baby vom Scheitel bis zum Steiss scho öppe 18.5 cm gross!! Mir sind jetzt also scho fascht i de hälfti vo de ganze Schwangerschaft...................... |