33-ischti Woche

Ziit rännt mir fascht devo............

Ond scho wieder isch en Arztbsuech noche gsi. Ich möchte mol no säge das min Frauearzt wörkli super nätt isch ond au d’Arztghilfin isch total en liebi. Ich chan ganz beruhigt det ane goh ond weiss, dass guet för mich glueged wird ond sie för alli Froge offe sind. Es isch eifach en entspannti Atmosphäre. Das schätz ich sehr!!

Nachdem ich im Dokter Kuster einisch meh gseit han das es mir näbscht de normale Schwangerschaftsbeschwärde guet goht, sind mir den au grad is Näbezimmer för de Ultraschall. Oises Baby het jetzt also nömme ganz platz uf em Bildschirm ond dorom han ichs leider nor so „verstöckled“ gseh. Aber wörkli Fotogen isch es jo ned gsi dasmol. Durend hets sini Ärmli vor em Gsicht gha.........darom gits leider au keis Ultraschallföteli! Aber de Arzt isch so uf mim Buch omegfrääsed das ich sogar s’Füessli vo onde gseh han.......so schnüsig! Wie gseit, ich bin ned so wörklich drus cho was mer alles gseht ond so, aber de Arzt het gfonde es isch alles in Ordnig ond das isch d’Hauptsach!

Da ich ned so en grosse Buch han, han ich mol gfroged ob den das normal isch oder ob ächt doch öppis ned stimmt? De Dokter Kuster het den s’Baby nomol richtig gmässe ond het feschtgstellt das es eigentlich scho chli es chlises Wörmli isch. Aber no völlig im Rahme! Es seiged zirka 70% vo allne andere Babys grösser ond de räschte öppe so wie oises oder nochli chliner, aber es seigi wörkli absolut okay! Das Wörmli ligt jetzt also au scho richtig i mim Buch inne. Das heisst mit em Chopf gäge abe ond s’Födli streckts gäge ufe. Hoffentlich wird’s em ned allzu schlächt ...........jetzt no 7 Woche im Chopfstand....... :-)

Natürlich han i au wieder döfe (müesse) uf d’Woog stoh..........es het mi also fasch uf de Rögge gschlage.....71 Kilo !!!!!! Jetzt bin also doch scho en rächte Brummer! Damol händs no so en Infektionsabstrich gmacht, zor Sicherheit das au das in Ordnig isch. Also das isch jo ganz Aagnehm gsi im gägesatz zo dere super Sprötze won ich no in “Ar.....” öbercho han!! Jo well ich jo d’Bluetgruppe 0 Negativ han ond de René A Positiv muess mer vorsorge, dass falls s’Baby im René sini Bluetgruppe öbernoh het, dass mis Bluet ned antikörperli bildet gäge A Positiv. Das wär sösch binere zwoite Schwangerschaft ned so guet! S’beschte isch jo no, das i nach de Geburt anschiindend nomol so en tolli Sprötze i min allerwertischte öberchome.

De Dötki het mi jetzt definitiv im Kantonsspital in Bade agmälded........uuupss.......jo es goht jo au nor no öppe 7 Woche............

S'Chinderzimmmer isch au fix fertig ond parat!! Han alles potzt, gstrigled ond schön gmacht, ned das de René den plötzlich no muess pressiere!! :-)